Stay Fit Pune - The weight loss center

खेळाडु व लॉकडाऊन – २

खेळाडु/खेळपटु/ॲथलेट्स साठी लॉकडाऊन नक्कीच चांगला नाहीये. किंबहुना लॉकडाऊन इथुन पुढे कुणासाठीच चांगला नाहीये. लॉकडाऊन विषयी माझे मत मी खाली थोडक्यात मांडण्याचा प्रयत्न करतो.

खरतर लॉकडाऊन करणे हा कोरोना विषाणु्च्या प्रसारावर उपाय , किमान आपल्या देशात तरी कामाचा नाहीये या मताचा मी बनलो आहे. आपल्या देशाची प्रचंड लोकसंख्या व तितकीच प्रचंड बेरोजगारी या आपल्यासमोरील महान अशा समस्या असतानाच, या समस्यांना घेऊन आपण कोरोनाच्या नियंत्रणासाठी इतर पुढारलेल्या देशांत ज्या प्रमाणे लॉकडाऊन हा मार्ग काढला गेला तसा तो आपल्याकडे होणे कठीण जात आहे. करोडो लोकांची दररोजचे जीवन आणि जेवण त्यांच्या हातावर आहे.  मध्यमवर्गीयांच्या समस्या  तर आणखीच बिकट आहेत. व लॉकडाऊन असाच वाढत राहिला तर या समस्या आणखी उग्र रुप धारण करतील.

सुरुवातीच्या काळात जेव्हा आपणास कोरोना म्हणजे काय हे माहीत नव्हते व त्यापासुन बचाव कसा करायचा हे माहीत नव्हते तेव्हा लॉकडाऊन गरजेचा होताच. व त्या लॉकडाऊनचा खुपच जास्त फायदा आपणास झाला. तो लॉकडाऊन जर झाला नसता तर आज आपल्या देशात देखील मृत्युचे तांडव एव्हाना सुरु झाले असते.

पण यापुढे लॉकडाऊन ची आवश्यकता नसुन, लोकांना कोरोनापासुन बचाव करीत करीत जनजीवन पुर्ववत कसे करता येईल यासाठी उपाय योजना करणे अपेक्षित आहे. पण असे न होता स्थानिक प्रशासन सर्रास लॉकडाऊनचा अवलंब करीत आहे. व हे आपणास महागात पडु शकते. यावर पुन्हा कधीतरी मी लिहिनच. तुर्त आपण एवढेच समजुन घेतले पाहिजे की ज्याप्रमाणे प्रशासनाने सर्रास लॉकडाऊन नाही केले पाहीजे तसेच नागरीकांनी देखील कोरोनापासुन बचावासाठी स्वयंस्फुर्तीने, स्वयंशिस्तीने प्रयत्न केले पाहीजेत. प्रशासन व नागरीक यांमध्ये ताळमेळ साधला गेला की हे सहज शक्य आहे

हा ताळमेळ होईल तेव्हा होईल.. पण काय तो पर्यंत खेळाडुंनी खेळापासुन दुरच राहायचे का? खेळापासुन खेळाच्या सरावापासुन दुर राहणे म्हणजे पाण्याशिवाय माशाची जशी अवस्था होते तशीच काहीशी अवस्था खेळाडुंची झालेली आहे. पण मग खेळाडुंनी करावे तरी काय? नुसते घरातच राहुन टिव्ही समोर वेळ घालवावा? की सतत फेसबुक ईंटरनेट वर टाईमपास करावा? प्रत्यक्ष मैदानावर जाता येत नाही तर नक्की करायचे काय की जेणेकरुन खेळासाठी या लॉकडाऊनचा उपयोग होईल?

तर मित्रांनो, खाली मी थोडक्यात लिहिण्याचा प्रयत्न करीत आहे की जेणेकरुन तुम्ही तुमच्या वेळाचा सदुपयोग करुन वेळ सत्कारणी लावाल.

• घरच्या घरी व्यायाम करावा. यासाठी तुम्हाला इंटरनेटचा खुप चांगला उपयोग करुन घेता येईल. युट्युब वर तुम्हाला घरच्या घरी, कोणत्याही साधनांशिवाय व्यायाम कसे करता येतात हे शिकता येईल. मी या काळात अनेक प्रकार शिकलो आहे. यापैकी मला आवडलेला प्रकार म्हणणे HIIT व्यायाम प्रकार . तुम्ही माझ्याकडुन देखील हे व्यायाम ऑनलाईन शिकु शकाल. या व्यायाम प्रकारात शरीरातील चरबी जाळण्याची खुपच जास्त क्षमता आहे. यात तुम्ही शरीराच्या एखाद्या विशिष्ट स्नायुच्या बळकटीसाठी देखील व्यायाम करु शकता.
• व्यायाम नुसता करुन काहीही उपयोग नाहीये. सोबतीला सकस व पौष्टिक आहार देखील घेणे गरजेचे आहे. घरीच असल्यामुळे, व घरातील सगळेच सदस्य घरातच असल्याने, साहजिकच घरात वेळोवेळी नवनवीन, चटपटीत व्यंजने, मेन्यु बनत आहेत. यापासुन स्वतःला वाचवणे कोणत्याही ॲथलेट पुढील मोठे आवाहन आहे. मोह होणे स्वाभाविक आहेच. पण तुम्ही जर दररोज न चुकता व्यायाम करीत असाल तर तुम्ही अशा मोहाला बळी पडणारच नाही. तसेच सकस , प्रोटीन युक्त आहार देखील घेणे या काळात जरा जास्तच गरजेचे आहे. या बाबतीत मी तुम्हाला मदत करु शकतो. अवश्य माझ्याशी संपर्क साधा.
• तुम्ही ज्या म्हणुन खेळात प्राविण्य मिळवु इच्छिता, त्या त्या खेळातील दिग्गजांच्या जीवनाचा अभ्यास तुम्ही या काळात करु शकता. मला रनिंग करणे खुपच आवडते. पण लॉकडाऊन मुळे मैदानावर जाणे शक्य नाहीये. रनिंग करता येत नाहीये. पण मित्रांनो या काळात मी ‘भाग मिल्खा भाग’ हा सिनेमा किमान पाच वेळा तरी पाहिला. दिग्गजांच्या चरीत्रातुन आपणास नेहमीच प्रेरणा मिळत राहते.

माझे प्रेरणा स्थान

• तुमच्या खेळातील बारकाव्यांचा अभ्यास करा. दिग्गज खेळांडुच्या जीवनातुन प्रेरणा जशी मिळते तसेच त्यांच्याकडुन खेळातील प्राविण्य देखील शिकता येऊ शकते. आता जमाना इंटरनेटचा आहे. तुम्ही घरबसल्या जगातील कोणत्याही महान खेळाडुचा खेळ पाहु शकता. त्यातुन खेळातील बारकावे शिकु शकता. असा कोणताही खेळ नाही की ज्याचे विडीओ इंटरनेटवर उपलब्ध नाहीत. इंटरनेट चा उपयोग केवळ व्हॉट्सॲप, फेसबुक, इन्स्टाग्राम साठीच न करता तंत्रज्ञानाद्वारे शिक्षण, प्रशिक्षण देखील घेता येते, हे लक्षात असु द्या.
• लॉकडाऊनच्या काळाचा उपयोग अनेक खेळाडुंनी नवनवीन कला आत्मसात करण्यात देखील घालवला. तसेच आपल्या खेळा व्यतिरिक्त तुम्हाला आणखी एखादी आवड जर असेल जसे फोटोग्राफी, लिखाण, कविता लिहिणे, कथाकथन, वाचन यासाठी आवर्जुन वेळ दिला गेला पाहिजे.
• फेसबुक, इन्स्टाग्राम वर तुमच्या आवडत्या खेळाडुला फॉलो करायला विसरु नका.

तर मित्रांनो मला जे सुचले व मी जे अनुभवले असे सल्ले मी तुम्हाला दिले आहेत. कोरोनामुळे प्रत्यक्ष खेळ अथवा सराव जरी शक्य नसला तरी त्यासाठी तयारी मात्र खुपच चांगली होऊ शकते. शांततेचा काळ हा युध्दाच्या काळापेक्षा खुपच जास्त महत्वाचा असतो. हाच काळ ठरवतो की जेव्हा कधी युध्द होईल तेव्हा आपण हरणार की जिंकणार! त्यामुळे मिळालेल्या या शांतीकाळात स्वतःला अधिक बलवान , शक्तिवान, अधिक विकसित, अधिक चपळ, अधिक शार्प जर तुम्ही करु शकलात तर भविष्य तुमचेच आहे.

कळावे

आपलाच

महेश ठोंबरे

Fitness coaches from Pune.

Author of this article is a well-known fitness coach from Pune. He has helped thousands of people with weight loss and weight gain. He runs a fitness club, weight loss centre in Hadapsar and Kothrud, Pune. Please feel free to contact him by submitting details below.